ALAM MINANGKABAU .....

Elok ranahnyo minangkabau
Rupo karambia tinggi - tinggi
Cando rumpuiknyo gantie gantielan
Rupo pinangnyo linggayuran
Bukik baririk kiri kanan
Gunuang Marapi jo Singgalang
Tandikek jo gunuang Sago
Pasaman jo gunuang Talang 
Aienyo janiah ikannyo jinak

Laweh alamnyo bakeh tagak
Sawah batumpuak di nan data 
Ladang babidang di nan lereang
Sawah bajanjang banda buetan
Sawah ladang labuah nan pasa
Taranak kambang padi manjadi
Buah jaguang maampai suto 
Padi masak jaguang maupiah
Lah masak padi di sawah
Padi ladang manguniang pulo
Ladang tabu manyintak rueh
Pisang badukuang di tandannyo
Antimun mangarang bungo
Batang labu marantang tali
Buah taruang ayun - ayunan
Buah lado mambintang timue
Buah kacang taji - tajian
Anak rancak minantu malin

Sajak durian di takuak rajo
Sialang balantak basi
Buayo nan putiah daguanyo
Sirangkak nan badangkang 
Sampai taratak aie hitam
Sampai riak nan badabui
Sampai kabateh indopuro
Sampai ka siak indogiri
Hinggo si pisak pisau hanyuik
Sampai sikilang aie bangih


Dimano asa titiak palito
Dibaliak telong nan batali
Dimano asa niniak kito
Dari lereang gunuang marapi


Digalundi nan baselo
dakek bukik siguntang-guntang
Dsinan lurah satungka banang
Sinanlah lurah ndak baraie
Disinan buki ndak barangin
Sinanlah banto nan barayun
Disinan batu hamparan putiah


pankiak pisau sirauik
Ambiak galah batang lintabuang
Salodang ambiak kanyiru
Nan satitiak jadi lauik
Nan sakapa jadi gunuang
Alam takambang jadi guru


Bangka ganok manahan cubo
Ameh batua manahan uji
Naraco pantang bapaliang
Anak nagari sakato hati
Satapak bapantang suruik
Salangka pantang babaliak


Adopun kasadonyo kito  di Minangkabau
Nan disungkuik langik,nan di tanai bumi
Nan saedaran kuliliang gunuang Marapi
Nan mahuni daerah bagian baraik
Samato alah banamo pulau Andaleh
Bapandirian bak kato nan tuo-tuo
Pulai juo nan batingkek naiak
maninggakah rueh jo buku
manusia nan bapangkek turun
maninggakan adai jo limbago
Gajah mati maninggakan gadiang
Manusia mati maninggakan jaso


Lah jadi kabiasaan kito
Rantau nan barajo
Luhak nan bapanghulu
Lah d  biasokan pulo di adaik kito
Adai nagari, nagari nan batuo
Mambuang sagalo nan buruak
Mamakai sagalo nan baiak
Nan sasuai pulo jo kkato nabi
Malarang urang mambuek jaek
Manyuruah urang babuek baiak


Mulai sajak maso dahulu
Sampai pulo jo maso kini
Sajak samulo sumua di gali
Sajak mulo nagari di huni
Adaik dipakai....syarak nan lazim
Duo hukum nan lah digunokan
Hukum Adaik jo Hukum Syarak


ITULAH NAGARI MINANGKABAU.......